Sosue 22

'Sʋ Sosue' 'kɩɩɛn Rubɛnɩ -nyʋ o, Gadɩ -nyʋ ke Manase 'a 'blʋa 'a 'blowɔn 'ɔ tɔo "jru i 2 -wɛe ɔ wlu ka 'de ʋʋ -pee ɔ 'na: Ao nʋ dɩ -wee' Nyɔsoa 'a dbo nʋ i Moisɩ "sia 'nynɩ 'mɛ -wɛe ao 'je dɩ ɔ "sia 'nynɩ wɔn. 3 Dɛ -tba' -sʋn -sia' -ɛ -jɛa -sɩan, ao se aoa' dedi' -wi" "itaa -wɛe ao 'je Nyɔsoa aoa' Kea 'a kɛ' ɛ "nyɩa aopʋ- -wee' wɔn. 4 Kaan ka la, Nyɔsoa aoa' Kea "nyɩ aoa' dedi' -wi" 'flɛ 'ʋn -tea' 'de 'blʋa -nɛ 'di, ka ɛ "sia ɛɛ' 'nynɩ ɛ. Ao bɛɛ la ao 'je demu ao 'je 'blʋa -nɩa aoa' dɛ 'di pa, 'blʋa Nyɔsoa 'a dbo nʋɩ Moisɩ "nyɩa aopʋ- -ɛ -jea aoa' dɛ nɩ 'de Sudɛn -gbuu 'de. 5 Ao -tu" kɛ' ke 'srɩn Nyɔsoa 'a dbo nʋɩ Moisɩ "nyɩa aopʋ- 'a 'sʋ wɔn: Ao 'je Nyɔsoa aoa' Kea 'a "dia! -Jeblʋ ɛ tɔɔa aopʋ- ao nɩɩ "i, ao 'je ɛɛ' kɛ' wɔn, ao ke ɛ "sii "i -wɛe ao 'je ɛɛ' dbo nʋ 'de aoa' pɛe ke aoa' -suu -wee' "klein 'ʋn.

6 'Sʋ Sosue' poɛ ʋʋpʋ "diwan -wɛe ʋʋ mu ʋʋa' blʋa 'di de. 7 Moisɩ "nyɩɛ 'blʋa Manase 'a 'blʋa 'a 'blowɔn 'ɔ tɔo 'de Basan. Ʋʋpʋ 'a tɔo -siae' Sosue' "nyɩɛ ʋʋpʋ 'blʋa 'de dedi' Israɛ -nyʋ "kwlu 'de Sudɛn -gbuu 'a 'jrʋ 'a blu 'ɩn. -Ta Sosue' 'na ʋʋ mu ʋʋ "bli ɛ, ɔ poɛ ʋʋpʋ "diwan 8 -wɛe ɔ -tuɛ" "kpei ka: Ao ka "wliiɛ -tuu" -tuu ke, "nɔdɩ 'a -gbʋn ke, wɛi -tuu" -tuu ke, "sani ke, -tiɛn ke nɩɩ ke, 'ʋnpaadɩ -tuu" -tuu ke. Dɩ ao -sa aoa' tʋnyʋ 'mʋa- ao sea ɩ 'ʋn 'de ao ke aoa' dedi' -wi" 'nynɩ.

9 Rubɛnɩ 'a "nynuu o, Gadɩ 'a -nʋ ke Manase 'a 'blʋa 'a 'blowɔn 'ɔ tɔo 'a -mu' de -wɛe -ke Israɛ -nyʋ 'a -cɛɛn "i 'de Silo 'de Kanaa blʋa 'di -wɛe -mu' Galadɩ 'de 'blʋa Moisɩ "nyɩa ʋʋpʋ 'de Nyɔsoa 'a wlu "i -nao.

10 -Ta ʋʋ nynɩa Kelilɔtɩ -nɩa 'de Kanaa blʋa 'di 'de Sudɛn -gbuu -kwli", Rubɛnɩ 'a "nynuu o, Gadɩ 'a "nynuu nmai nynuu ke Manase 'a 'blʋa 'a 'blowɔn 'ɔ tɔo ma "kpa klaa" 'de "ni -gbuu -nɛ -kwli". 11 Ɛɛ' "kuan mu' 'sʋ ɛ je Israɛ -nyʋ -siae' jɛɛ, dɛ-nʋɛ' ka nyʋ a 'da ka: Rubɛnɩ 'a "ji 'di nyʋ ke Gadɩ 'a -nʋ ke Manase 'a 'blʋa 'a 'blowɔn 'ɔ tɔo ma "kpa 'de Kanaa blʋa "juɛi 'de Kelilɔtɩ -pʋn" 'de Sudɛn 'ɛ 'kpʋʋ "kpei, 'de Israɛ -nyʋ 'a 'fɔ "i.

12 -Jɛ Israɛ -nyʋ 'wɔɛn 'sʋ ʋʋ -wee' 'kɩɩɛn "jru i 'de Silo, -wɛe ʋʋ 'je ʋʋa' 'cɛ -sia 'de Sudɛn tʋ o -fʋan' mu. 13 Israɛ -nyʋ dboɛ 'sraa -sai Eleasa 'a "ju Pineasɩ Rubɛnɩ 'a 'blʋa 'a 'blowɔn ke, Gadɩ 'a -nɩ ke Manase 'a 'blʋa 'a 'blowɔn 'ɔ tɔo -nɩa 'de Galadɩ "i, 14 ʋʋ dboɛ -gbɛin" "jrukpɔ i -tenyʋ -puue ʋʋ -sa Israɛ 'ɛ 'blʋa 'a 'blowɔn 'di i do do -ke. 15 Ʋʋ muɛ 'de Rubɛnɩ 'a "nynuʋ nmai nynuu ke, Gadɩ 'a -nʋ ke Manase 'a 'blʋa 'a 'blowɔn 'ɔ tɔo o, 'de Galadɩ -blʋa 'di, -wɛe ʋʋ wlu ʋʋpʋ -pee ka, ʋʋ 'na: 16 Dɛ Nyɔsoa 'a 'cɛ 'na -a -tmʋ ɛ ka: Dɛ -ma 'a kpʋn wlu "kpei 'de Israɛ 'ɛ Kea -pee -mɛ -sa wɔ -ɛ, 'de dɛɛ -tɩ ao 'kpaa Israɛ -nyʋ 'a Kea 'cɛn i -ɛ? Dɛɛ -tɩ kaan la aoa -saa' "jru -jei" 'de Nyɔsoa o -ɛ? 'Kae -bo aoa sea aoa' -cɛ" 'ɛ "kpa ma a, -mɛ ao 'kpaa ɛ 'cɛn i. 17 -A nʋɛ dɛsaʋn klaa" 'de 'de peɔ -wɛe -a kpʋn -flɛn" ke dɛ -jɛa -sɩan a 'de -mɛ dɛsaʋn klaa" je -aʋn "jri i nʋɛ. -Jɛ -nɩa 'mʋa- -ɛ -nʋa Nyɔsoa 'a 'cɛ "jri i -mɛ se "i -tie kee? 18 Kaan ka la, ao 'je Nyɔsoa 'kpʋ "i to -o? -Bo -sɩan, -bo ao 'kpaa ɛ 'cɛn i, -klae" ɛ, ɛɛ muɛ 'cɛn 'kpaa 'de ɛɛ 'cɛ Israɛ -nyʋ -wee' "klein "kpei -ke. 19 -Bo ao mɔ naa tɔ' i la -bo 'blʋa -nyɩ" aopʋ- se i -kwɛ, -mɛ aoa' ji 'nɔ 'blʋa -jɛ -nɩa Nyɔsoa 'a 'blʋa 'dii, -ta ɛɛ' 'sraa -sana' nɩa, -wɛe aoa' "ti 'de -a "kwlu, 'kaa ao 'de Nyɔsoa 'cɛn i 'kpaa 'dewlɛ ao 'de -a "juɛi i nynaa 'de aoa' -nɩ "kpa -sea' Nyɔsoa -aa Kea 'a "kpa nɩ 'a poa' 'ʋn 20 Nɔ' -ɛ 'di -Sela 'a "ju Akan nʋa dɛsaʋn klaa" -wɛe ɔ "jria dɩ -tea Nyɔsoa 'a -tea' a, Israɛ -nyʋ -wee' "klein mʋ ɛɛ' 'cɛn ji "kpei, ɛ se ɔ mɔ due' 'a ma" i -sa 'de ɔɔ' dɛsaʋn 'a -tɩ' 'ʋn nɩ.

21 Rubɛnɩ 'a "ji o, Gadɩ 'a -nʋ ke Manase 'a 'blʋa 'a 'blowɔn 'ɔ tɔo -sɛ "kpei ka 'de Israɛ -nyʋ 'a "jrukpɔ i -tenyʋ -pee: 22 Kea, Kea, Nyɔsoa juo nɛ, 'de Israɛ a muɛ jua' -ke! -Bo ɛ nɩ "jru kua' 'dewlɛ ɛ -maa' kpʋn wlu "kpei 'de Nyɔsoa -pee 'mɛ -tɩ -a ma "kpa -nɛ ɛ, -mɛ ɛ 'de -a -tɩ' "kpei -saa'. 23 -Bo ɛ nɩ -a -je Nyɔsoa 'kpʋ "i to mɛ -tɩ -a ma "kpa 'de -a -je 'sraadɩ -ɩ -wee' nɛ dia ke -pɔnya' ke 'sraadɛ -wlʋa 'de 'blʋ 'ʋn 'dewlɛ nyɔ ke Nyɔsoa 'a "i "sia 'a 'sraa -sa a, Nyɔsoa 'a -cɛ" -tee -a -mi i. 24 'Kaa ɛ se -mɛ nɩ! -A nʋɛ' dɛ-nʋɛ' faʋn -a 'nʋ -aʋn, -bo 'wɩ deejrɛ' 'di ɛ, -aa "nynuu 'bɛɛ ʋʋ 'je ka 'da 'de -a -pee: Dɛ ao 'je Nyɔsoa Israɛ -nyʋ 'a Kea -mɛ nʋʋ -ɛ? 25 Ɛɛ' -cɛkpa' -se' Sudɛn -paʋn 'ʋn poo 'de -amɔ Rubɛnɩ "ji ke Gadɩ "ji ke ʋʋpʋ 'nynɩ? Aoa' dɛjrɛ' se 'de ɛ o sie! -Bo ɛ nɩ 'kan aoa' "nynuu se -aa -nʋ "itaa i ʋʋ se Nyɔsoa plee i. 26 Ɛmɛ -tɩ -a -naa tɔ' i -wɛe -a ma "kpa, ɛ se -a -je 'sraadɛ -ɛ -wee' nɛ dia ke 'sraa -wee' -sa nɩ, 27 'Kaa -a nʋɛ' -wɛe ɛ 'je ka -tɩ' 'a -ta 'jei nɩa nɩ 'de -a -ke aopʋ- 'nynɩ, 'de aopʋ- 'a "nynuu ke -aa "nynuu 'nynɩ, -a -nɩɛ "i -ke -a -je Nyɔsoa -gbɛɛ 'de ɛɛ' -cɛ" "juɛi, 'de -aa 'sraadɛ -ɛ -wee' nɛ dia ke nyɔ ke Nyɔsoa 'a "i "sia 'a 'sraa ke 'sraa -jɩ -sia 'e ke. -A seɛ "i nɩ 'wɩ deejrɛ' 'di aoa' "nynuu 'je wlu ka 'de -aa -nʋ -pee: Aoa' dbo deejrɛ' se 'de Nyɔsoa 'a -tɩ' 'ʋn nɩ! 28 Ka -a -wlu ka 'de -aa -cɛ" -pee -a -na: -Bo ʋʋ wlu 'wɩ deejrɛ' 'di ka 'de -apʋ ke -aa "nynuu -pee, -a -bɛɛ' -a -jeɛ "kpei -sa, -a -je wlu ka -a -je nʋ: Ao -gbʋn "kpa -aa "bɛma -wi" ma -ɛ -nɩa Nyɔsoa 'a -nɩ 'a -koɔ dɛ ɛ. Ʋʋ 'mɛ ɛ se ʋʋ 'je 'sraadɛ -ɛ -wee' nɛ dia ke 'sraa -wee' -sa 'de ɛ "kpei nɩ, -mɛ ɛ 'je -tɩ' 'a -ta 'jei nɩ 'de aopʋ- ke -a 'nynɩ! 29 Nyɔsoa 'cɛn i 'kpaa mɛ se -a "jru 'di cɛɛn mɔ due' -wɛe -a -je "kpa ma 'de -a -je ɛɛ' "juɛi -gbɛa' "itaa 'de -a -je 'sraa -ɛ -wee' nɛ dia ke -pɔnya' 'sraadɛ -wlʋa 'de 'blʋ 'ʋn ke 'sraa -siae' -wee' -sa, "kpa -ɛ -nɩa Nyɔsoa -aa Kea "kpa -nyna i 'de ɛɛ' -gbɛɛna' "juɛi "cɛi o nʋ dɛ nʋ.

30 -Jɛ 'sraa -sai pineasɩ o, Israɛ -nyʋ 'a -kekpasoa ke ʋʋa' "jrukpɔ i -tenyʋ 'wɔan -tɩ' Rubɛnɩ 'a "nynuʋ nmai o, Gadɩ 'a -nʋ ke Manase 'a 'blʋa 'a 'blowɔn 'ɔ tɔo -sa wɔ, 'sʋ ʋʋ -wee' 'a pɛe 'blʋ. 31 'Sraa -sai Eleasa 'a "ju Pineasɩ wluɛ Rubɛnɩ 'a "nynuʋ nmai ke, Gadɩ 'a nʋ ke Manase 'a 'blʋa 'a 'blowɔn 'ɔ tɔo 'a "nynuʋ nmai -pee ɔ 'na: -A -juo 'nɛ ka Nyɔsoa 'a -cɛ" nɩa 'de -a "kwlu ɛ, dɛ-nʋɛ' ao se Nyɔsoa 'kpʋ "i to, -jɛ ao nʋa 'kan -mɛ 'puu- Israɛ -nyʋ 'ɛ "nynuu 'mɛ 'de Nyɔsoa 'Kwa.

32 -Mɛ 'wlua 'e -jei" ɛ, 'sraa -sai Pineasɩ 'a "ju Eleasa o, Rubɛnɩ 'a "nynuʋ nmai 'a "jrukpɔ i -tenyʋ ke Gadɩ 'a -nʋ 'wlʋɛ 'de Galadɩ -wɛe ʋʋ mu Kanaa 'de Israɛ -nyʋ -sia 'emu o, -wɛe ʋʋ po ʋʋpʋ dɩ -nʋa 'a "kʋʋan. 33 Israɛ -nyʋ -wee' 'a pɛe 'blʋ -wɛe ʋʋ po Kea "diwan. Nyɔ deejrɔ' se Rubɛnɩ ka Gadɩ tʋ o -fʋan' mu -tɩ 'tmʋ 'de ʋʋ se ʋʋa' 'blʋa i -sa la 'bode. 34 Rubɛnɩ 'a "nynuʋ nmai nynuu ke Gadɩ 'a -nʋ a 'daa "kpa ʋʋpʋ poa -nɛ Ɛdɩ (-tɩ' 'a -ta 'jei) -wɛe ʋʋa 'da ka: Ɛ nɩɛ -tɩ' 'a -ta 'jei 'de -a ke Nyɔsoa due' -nɩa Kea 'nynɩ.